Suatu hari di tahun 1997 kelar sholat magrib ane mo balik dari Padepokan Pencak Silat TMII. Waktu itu padepokan emang selalu ramai dengan berbagai aktifitas pengurusnya. Ane sering nyambangin padepokan, selain sebagai reporter RCTI bikin liputan juga sekedar kongko di sekretariat yg dikomandanin Pak Tata. Ane samperin ruang pak Edi M Nalapraya mo pamitan. Pak Edi yang rupanye mo pergi juga, malah nanya, lu mo kemane Yus ? Mo ke rumah ibu, ade acara 3 hari babe.
Sebelomnye, ane emang kabarin kalo babe ane kemarenan wafat lantaran motor Vespanya nabrak mobil yg lagi berenti di depan kantor BIN Kalibata. Kejadiannye bada Isa pas kondisi cuaca hujan, klar ngajar ngaji di mushola deket-deket situ. Masa pengsiunannye babe emang aktif ngajar di beberapa mushola atau masjid nerusin Guru Amin, bapaknye. “Umur berape bapak lu?” tanya pak Edi. “72” jawab ane. “Kok lu masih izinin naik motor,” selidik pak Edi menohok. Sebuah pertanyaan yg juga jadi permohonan ane ke babe supaya kalo ngajar ngaji pake mobil aja. “Tempat ngajar gw pade masuk gang, mobil kagak bisa lewat,” begitu alasan babe ane.
***
“Bareng aja, ntar gw liwatin rumah emak lu,” kata pak Edi ngajak ane pulang bareng. Masuk mobil, ane duduk di depan bareng supir, pak Edi duduk di belakang. Di dalam mobil pak Edi genggemin duit ke ane, lupa banyaknye berape. “Kasih emak lu buat tahlilan,” kata pak Edi.
Di perjalanan pak Edi tiba2 ngomong, Yus gw laper kite makan dimane ? Ane bilang makan sate ame sop betawi mo gak be ? Kite pun berenti di warung sate dan sop betawi H Margani di Keramat Jati (sekarang udah nggak ada padahal dulunye ngetop banget). Begitu masuk warung, pak Edi liat ade foto Ali Sadikin ame Tjokropranolo masing-masing berdampingan ame almarhum H Margani. Wah foto bang Ali ame bang Noli kate pak Edi. Terus die nanye dah ke anak H Margani yg nerusin tuh warung, ” kok foto gw nggak ade ?”. Ntu anak H Margani kincep terus nyengir kuda. “Lu kenal gw nggak ?” tanya pak Edi rada kereng nade suarenye. “Kenal pak, Bapak Edi M Nalapraya mantan wagub,” jawab tuh anak H Margani. “Nah … taro dong foto gw di situ!”…. “iye be,” jawab si anak H Margani, lagi2 sambil nyengir kuda 😂
