kebudayaanbetawi.com Laboratorium dan Lembaga Ketahanan Adat Istiadat Seni Budaya Betawi Website Resmi Lembaga Kebudayaan Betawi
(Cerita dari pinggiran Jakarta)
kebudayaan betawi – Sekuntum kembang Tablo. Mentari baru aja nongol di balik awan, sorotan cahaya nya masuk ke rumah lewat jendela depan nyeng di ablagin ama enyak, sengaja orang dulu mah begitu pintu, jendela pada di ablagin biar angin ama sinar mentari masuk dan katanya kalo pintu ama jendela di ablagin entuh rejeki pada dateng.
Sekuntum kembang Tablo. Perempuan paro baya entuh udah abis bedug shubuh ,abis sembahyang udah semelepangan apa ge dia kerjain dari nyapuin latar ama kedangsakan di dapur bikin nasi goreng kunyit buat sarapan baba nyeng udah siap ama baju dinesnya, bari ngikir pacul baba nyeruput kopi pait ama sisa dodol buluk nyeng masing ada sisa lebaran, begitu ge berasa nikmat beud romanah.
Sekuntum kembang Tablo. Sementara onoh anak lakinya masing kredongan bari ngejengkang di bale, abis sembahyang shubuh kaga kuat nahan ngantuk malem abis nonton Topeng di kampung sebelah, kaga peduli romanah ama suara burung Cici nyeng pada cewoh di pu-un kaca beling, suara kambing gegembretan bae ge kaga gegetun pisan romanah, entuh bocah tibra bener romanah molornya.
” Bujug dah.. Enih bocah mentari udah nyorot masing ngegoler bae.. Abis dah entuh rejekinya di patol ayam! ” Kata enyak bari bawa aer sebatok buat merodin muka si Janim , anak lakinya nyeng masing ngeringkuk kaya engkuk di bale.
Entuh aer di perodin di muka Janim, lantas entu bocah gelagepan mukanya kena nyeng rada adem-adem.
” Buseh enyak kita kira apaan adem-adem di muka! ” Janim nyengir ngiat enyak ngejogrog di adepan nya bari megang batok isi aer.
” Untung bukan tai burung dara nemplok di muka luh.. Onoh baba luh udah duluan ke sawah, eluh di suruh nyusul… Sono gih cuci muka ama kekumur! ” Enyak nyerocos kaya daon ninjo kering di ceblusin di tabunan.
” Di dapur enyak udah masakin Nasi goreng kunyit noh.. Uman rada kurang gurih minyak goreng nya abing belon sempet beli lagi.. Ongkoh duitnya kon rada langka! ” Sambung enyak begitu dah namanya orang tua kalo rada bawel dikit berarti entuh dia mulain pengen di perhatiin, kitanya kudu pada bisa ngimbangin biar kaga nyakitin atinya.
Sekuntum kembang Tablo. Janim biar rada bengal kalo enyaknya udah gegawokan mah sigrah dah tuh bocah dengerin apa nyeng enyak suruh, buru-buru dia ke sumur cuci muka ama kekumur di ember timba karena aer di gombangan kering belon ada nyeng ngisi, bari olahraga entuh bocah ngisi gombangan dah pake timba kerek.
Emang entuh bocah abis lulus sekola Esema belon nemu kerjaan nyeng rada neneban , dia merasa kasian ama babanya nyeng udah ngiklasin sawahnya dua petak pindah ke orang laen buat bayarin sekolanya dulu, tapi ampe ari gini dia belon bisa mulangin entuh apa nyeng udah baba kasih, dia punya tekat suatu ari nanti bisa ganti sawah baba ama nyeng lebih lebar. ( bersambung)
Sarin Sarmadi (Bang ILok)
Ketua Yayasan Kebudayaan Orang Bekasi (KOASI)
