kebudayaanbetawi.com Laboratorium dan Lembaga Ketahanan Adat Istiadat Seni Budaya Betawi Website Resmi Lembaga Kebudayaan Betawi
kebudayaan betawi – Silaturahmi alias nempo sodara udah jadi budaya orang kita dari dulu kala, mangkanya kalo orang dulu pada majang meja ama bale didepan rumah salah satunya biar orang yang dateng namu langsung bisa duduk dan dimeja udah disiapin kendi ama gelas biar tamu yang abis jalan jauh bisa langsung minum kaga kudu nunggu diambilin dulu,buseh dah entuh aer kendi kalo udah masuk tenggorokan rasanya adem beud,orang nyeng pada jalan jauh kalo udah kena aer kendi jadi seger lagi dah.
Bukan uman aer doang nyeng dikuarin ,nyak ama baba dulu mah pada gegerusukan didapur nyari jaburan buat tetamu pada ngampo , entuh kopi ama dodol buluk pada dikuarain dah, lakinya nemenin tamu,bininya ngedutrun di dapur saking aja dulu mah entuh ama makanan rada gampang entuh kimpul dikorekin ,ubi jalar ama ubi butun tinggal gali ama nyabut dikebon apalagi kalo musim gadung entuh tamu kita kasih kukusan gadung pake ampas kelapa ge udah pada ongkoh bae bari sila ngopi di bale lah resep kaga berasa entuh ubi dipiring ampe bures saking upleknya ngegunteng.
kaga uman ampe disitu kalo nyeng dateng tamu nyeng rada jauan ,apalagi udah lama kaga namu ,tani beud kata orang dulu mah kalo kaga dikasih makan kurang afdhol bagen biar makan uman ama pepes peda ama sayur sueg ge nyeng penting ada dan entuh tamu kudu pada makan,kalo kaga makan tuan rumah merasa kaga diorangin,bagen hidangan ala kadarnya ge nyeng namanya tamu kudu di horamtin ,tapi nyeng namanya masakan orang dulu ibarat kata makan tibang ama pecakan boong ge rasanya nikmat bener, apalagi enih mah ada peda pepes ama sayur sueg lah sedep beud dah ,apalagi dihidanginnya dengan ati nyeng iklas dan niat menghormati tamu ntuh masakan jadi berasa sumbrah dan nikmat.
Sekarang mah koan udah rada ilang budaya kaya begitu,jangankan orang pada mampir buat nenamu karang mah ,entuh rumah kita masuk aja susah pager tembok ama besinya pada tinggi udah gitu pake digembok kalo manggil kudu di geroin bikin orang pada segen ngelongok dah,apalagi kalo entuh orang udah adaan punya sedara rada miskin tinggal di kampung jalan nya nyeblok boro-boro pada mo nyaba ,inget aja ge gogah…
Sarin Sarmadi (Bang ILok)
Ketua Yayasan Kebudayaan Orang Bekasi (KOASI)
